ನವದೆಹಲಿ, ಅಕ್ಟೋಬರ್ 17: ಈ ವರ್ಷ ಟೆಕ್ ಕ್ಷೇತ್ರದಲ್ಲಿ ಉದ್ಯೋಗಕಡಿತ (job loss) ನಿಲ್ಲುವ ಸಾಧ್ಯತೆ ಕಾಣುತ್ತಿಲ್ಲ. ಹೆಚ್ಚೂಕಡಿಮೆ ಒಂದೂವರೆ ಲಕ್ಷ ಉದ್ಯೋಗಿಗಳಿಗೆ ಕೆಲಸ ನಷ್ಟ ಕಂಡಿರುವ ಟೆಕ್ ಕ್ಷೇತ್ರದಲ್ಲಿ ಈಗ ಇನ್ನಷ್ಟು ಲೇ ಆಫ್ (layoffs) ನಡೆಯುತ್ತಿದೆ. ಮೈಕ್ರೋಸಾಫ್ಟ್ ಮಾಲಕತ್ವದ ಲಿಂಕ್ಡ್ಇನ್ (LinkedIn) ಸಂಸ್ಥೆಯ ಎಂಜಿನಿಯರಿಂಗ್, ಫೈನಾನ್ಸ್ ಮತ್ತು ಎಚ್ಎರ್ ವಿಭಾಗದಿಂದ 668 ಮಂದಿ ಕೆಲಸ ಕಳೆದುಕೊಳ್ಳಲಿದ್ದಾರೆ. ಮೇ ತಿಂಗಳಲ್ಲಿ 716 ಮಂದಿಯನ್ನು ಕೆಲಸದಿಂದ ತೆಗೆದಿದ್ದ ಲಿಂಕ್ಡ್ಇನ್ ಈಗ ಮತ್ತೊಂದು ಶಾಕ್ ಕೊಡಲು ನಿರ್ಧರಿಸಿದೆ. ನಿರೀಕ್ಷಿತ ರೀತಿಯಲ್ಲಿ ಆದಾಯ ಹೆಚ್ಚಳ ಆಗಿಲ್ಲದಿರುವುದು ಲಿಂಕ್ಡ್ ಇನ್ ನಿರ್ಧಾರಕ್ಕೆ ಕಾರಣ ಎನ್ನಲಾಗಿದೆ. ರಾಯ್ಟರ್ಸ್ ಸುದ್ದಿ ಸಂಸ್ಥೆ ಇದರ ವರದಿ ಮಾಡಿದೆ.
ಇದನ್ನೂ ಓದಿ: ಆಸ್ಪತ್ರೆಗೆ ದಾಖಲಾದ ಮಾಜಿ ಸಿಎಂ ಬೊಮ್ಮಾಯಿ
ಲಿಂಕ್ಡ್ಇನ್ನಲ್ಲಿ 20,000 ಮಂದಿ ಕೆಲಸ ಮಾಡುತ್ತಿದ್ದಾರೆ. ಇವರಲ್ಲಿ ಶೇ. 3ರಷ್ಟು ಮಂದಿಗೆ ಕೆಲಸ ಹೋಗುತ್ತಿದೆ. ಈ ಬಗ್ಗೆ ಲಿಂಕ್ಡ್ಇನ್ ತನ್ನ ಬ್ಲಾಗ್ ಪೋಸ್ಟ್ನಲ್ಲಿ ಬರೆದುಕೊಂಡಿದ್ದು ಹೀಗೆ:
‘ನಮ್ಮ ಸಂಘಟನೆಯ ರಚನೆಯಲ್ಲಿ ಬದಲಾವಣೆ ಮಾಡುತ್ತಿರುವ ಹೊತ್ತಿನಲ್ಲೇ ನಮ್ಮ ಭವಿಷ್ಯಕ್ಕೆ ಅಗತ್ಯವಾದ ಆದ್ಯತೆಗಳಿಗೆ ಹೂಡಿಕೆ ಮುಂದುವರಿಸುತ್ತೇವೆ. ನಮ್ಮ ಸದಸ್ಯರು ಮತ್ತು ಗ್ರಾಹಕರಿಗೆ ಮೌಲ್ಯಯುತ ಸೇವೆ ಸಿಗುವುದನ್ನು ನಾವು ಖಾತ್ರಿಪಡಿಸಲು ಯತ್ನಿಸುತ್ತಿದ್ದೇವೆ’ ಎಂದು ಲಿಂಕ್ಡ್ಇನ್ ಬರೆದಿದೆ.
ಇದನ್ನೂ ಓದಿ: ಉಳ್ಳಾಲ : ನೇತ್ರಾವತಿ ಸೇತುವೆಯಲ್ಲಿ ಬಸ್, ಕಾರು, ಲಾರಿ, ರಿಕ್ಷಾ ಸೇರಿದಂತೆ 9 ವಾಹನಗಳ ನಡುವೆ ಸರಣಿ ಅಪಘಾತ…!
ಲಿಂಕ್ಡ್ಇನ್ ಸಂಸ್ಥೆ ವಿಶ್ವಾದ್ಯಂತ 95 ಕೋಟಿಗೂ ಹೆಚ್ಚು ಮಂದಿಯ ನೆಟ್ವರ್ಕ್ ಹೊಂದಿದೆ. ಎಲ್ಲಾ ಕ್ಷೇತ್ರದ ಉದ್ಯೋಗಿಗಳ ಪ್ರೊಫೆಷನಲ್ ನೆಟ್ವರ್ಕ್ ಇದಾಗಿದೆ. ಉದ್ಯೋಗ ಅರಸಲು ಅಥವಾ ಉದ್ಯೋಗಿಗಳನ್ನು ಹುಡುಕಲು ಈ ನೆಟ್ವರ್ಕ್ ಬಹಳ ಉತ್ತಮ ಪ್ಲಾಟ್ಫಾರ್ಮ್ ಆಗಿದೆ. ಇದು ಕೇವಲ ಉದ್ಯೋಗಕ್ಕಾಗಿ ಮಾತ್ರ ಸೀಮಿತವಾಗದೇ, ಬ್ಲಾಗ್ಪೋಸ್ಟ್ಗಳಿಗೂ ಅವಕಾಶ ನೀಡುತ್ತದೆ.
ಲಿಂಕ್ಡ್ಇನ್ ಸಂಸ್ಥೆ ಆದಾಯ ಹೆಚ್ಚಿಸಲು ಪರದಾಡುತ್ತಿದೆ. 2023ರ ಹಣಕಾಸು ವರ್ಷದ 3ನೇ ಕ್ವಾರ್ಟರ್ನಲ್ಲಿ ಶೇ. 10ರಷ್ಟು ಆದಾಯ ಹೆಚ್ಚಳ ಕಂಡಿದ್ದ ಅದು ಮಾರ್ಚ್ ಅಂತ್ಯದ ಕೊನೆಯ ಕ್ವಾರ್ಟರ್ನಲ್ಲಿ ಶೇ. 5ರಷ್ಟು ಮಾತ್ರವೇ ಆದಾಯ ಹೆಚ್ಚಳ ಕಂಡಿದೆ.
ಮೇ ತಿಂಗಳಲ್ಲಿ ಲಿಂಕ್ಡ್ಇನ್ 716 ಉದ್ಯೋಗಿಗಳನ್ನು ಲೇ ಆಫ್ ಮಾಡಲು ನಿರ್ಧರಿಸಲಾಗಿತ್ತು. ಆಗ ಸೇಲ್ಸ್, ಆಪರೇಷನ್ಸ್ ಹಾಗೂ ಸಪೋರ್ಟ್ ವಿಭಾಗಗಳಿಂದ ಉದ್ಯೋಗಕಡಿತವಾಗಿತ್ತು.
ಈ ವರ್ಷ ಟೆಕ್ ಕ್ಷೇತ್ರದಲ್ಲಿ ಬಹಳ ಹೆಚ್ಚಿನ ಪ್ರಮಾಣದಲ್ಲಿ ಲೇ ಆಫ್ ಆಗುತ್ತಿದೆ. 8-9 ತಿಂಗಳಲ್ಲೇ ಒಂದೂವರೆ ಲಕ್ಷದಷ್ಟು ಮಂದಿ ಕೆಲಸ ಕಳೆದುಕೊಂಡಿದ್ದಾರೆ. ಈ ವರ್ಷ ಮುಗಿಯುವುದರೊಳಗೆ ಇನ್ನೂ ಬಹಳಷ್ಟು ಮಂದಿಯ ಲೇ ಆಫ್ ನಡೆಯುವ ಭೀತಿ ಇದೆ.
